Adblog

Paid â becso: nid yw’r teitl yn golygu fy mod i wedi penderfynu gwneud arian drwy ddodi hysbysebion ar y blog.

Hanes trafferth a gefais i’r diwrnod o’r blaen yw e, a fydd efallai o ddiddordeb i unrhyw un sy’n blogio ar WordPress ac sydd hefyd yn ceisio osgoi gweld gormod o hysbysebion ar wefannau eraill. Pan es i’r dudalen lle bydda’i’n paratoi cofnod newydd, roeddwn yn methu teipio dim byd, nac ychwanegu lluniau, na thagiau. Ar ôl gwneud y pethau arferol (clirio hen bethau, diffodd ac ailddechrau) ac ysgrifennu nodyn ar fforwm WordPress yn gofyn a oedd unrhyw un arall wedi cael yr un profiad, es i ati i geisio gweld a oedd unrhyw beth arall yr oeddwn yn ei ddefnyddio yn achosi’r broblem.

A’r ateb oedd Adblock. Ymhen dim fe gefais i’r un wybodaeth gan fforwm WordPress hefyd, felly mae angen diolch iddyn nhw. Roedd yn ddigon hawdd ddod dros y peth; mae gan Adblock eicon bach ar waelod y sgrîn, a saeth wrth ei ochr. O glicio ar y saeth fe agorodd popeth fel y dylai fe.

Ond o chwilio heddiw i weld a oedd yna unrhyw drafodaeth gyffredinol wedi bod, des i ar draws nifer o gyfeiriadau gan flogwyr WordPress sydd yn cynnwys hysbysebion. Roedden nhw’n canu clod rhaglen arall sydd yn bloco Adblock, fel bod darllenwyr eu blogiau’n gorfod gweld yr hysbysebion. Carfan arall yn pwyntio mâs ein bod ni’n cael defnyddio WordPress am ddim, ac yn synnu bod pobl yn ceisio gwneud elw mâs ohono.

Bydd y blog hwn yn aros heb hys-bys.