Straeon diweddar: Diweddaru

Mae Sbaen yn dal heb lywodraeth, chwech wythnos ar ôl yr etholiad cyffredinol. Mae’r cyn Brif Weinidog, Mariano Rajoy (PP), sy’n dal i weinyddu’r wladwriaeth er na all wneud deddfau newydd, wedi gwrthod mynd i bleidlais ar ei arweinyddiaeth ef achos nad oes digon o gefnogaeth ganddo yn y Cortes, y brif siambr.

Tro Pedro Sánchez (PSOE) yw hi felly i geisio ffurfio llywodraeth glymbleidiol. Mae ef wedi gwrthod gweithio gyda’r PP, ac ar hyn o bryd yn dilyn trywydd anodd rhwng Podemos, y pleidiau cenedlaetholgar o Gatalwnia, a Gwlad y Basg, ac arweinyddion rhanbarthol ei blaid ei hun. Mae nifer o’r rhain, yn enwedig Susana Díaz (Andalucia) yn anfodlon iawn cydweithio â’r cenedlaetholwyr. Ac yn awr mae Sánchez wedi addo y caiff aelodau’r blaid rhoi barn ar y cynnig. Aros mwy.

A’r dywysoges? Mae ei hymdrech hi i ddianc rhag yr achos llys wedi methu. Bydd Cristina yn y doc yn Palma de Mallorca ar y 9fed o Chwefror, ar gyhuddiadau o dwyll ariannol gyda’i gŵr a rhai o’r bobl oedd yn gweithio iddynt.

Ac mae nifer o achosion llys eraill yn ystod y Mis Bach fydd yn siŵr o ddenu cyfryngau’r byd.

Yfory a thrennydd bydd seren FC Barcelona, Neymar, ei dad a’r clwb ei hunan, yn wynebu cyhuddiadau o dwyll a llygredd ariannol ynglŷn â’r modd yr arwyddwyd ef i’r Barca.

Bydd llu o gyn-wleidyddion, bancwyr a dynion busnes o flaen eu gwell ymhob ran o Sbaen ar gyhuddiadau tebyg: i gyd, y ôl yr erlyniad, wedi manteisio ar eu safleoedd pwysig i ddwyn arian y cyhoedd mewn rhyw ffordd neu’i gilydd.. Yn eu plith cyn-lywydd llywodraeth Catalwnia, Jordí Pujol, cyn-bennaeth y cyn-fanc Bankia, Rodrigo Rato (caru’r enw!), a chyn-drysorydd y PP, Luis Bárcenas.   Mae’r achosion hyn wedi cymryd blynyddoedd i gyrraedd y llys, ond dyma nhw o’r diwedd.