Trên Cyflym yn Arafu

Rydym ni yn Sbaen yn dal i fyw drwy gyfnod o drawsnewid ar ôl etholiad yr 20fed o Dachwedd: er bod Rajoy a’r PP wedi ennill, ac ennill o ddigon, dyma faint o amser mae’n cymryd fan hyn i’r llywodraeth newydd gymryd yr awennau. Yr hen lywodraeth sy’n dal yn rheoli, o dan reolau; yn y cyfamser mae mis o drafod yn mynd ymlaen ynghylch materion sydd ar eu hanner, boed yn arian, newidiadau gweithiol, materion allanol (Ewrop!), neu  brosiectau trafnidiaeth.

A ie, trafnidiaeth. Ac yn enwedig, trenau. Daeth i’r amlwg heddiw bod y PP wedi gofyn yn unswydd i’r gweinidog trafnidiaeth dros dro i beidio ag arwyddo unrhyw gytundeb ynglŷn â llwybrau ymhellach i’r AVE (y trên cyflym iawn) yn Galicia. Bydd hyn yn golygu bod y leiniau sydd ar y gweill yn barod – mae un i fod i agor ddydd Sadwrn nesaf – ond yn uno prif ddinasoedd Galicia yn lle darparu dolen gyflym rhwng Galicia a gweddill Sbaen.

Mae’r hen lywodraeth, y PSOE, wedi cytuno i werth €3.8m o waith ar yr AVE yn Galicia yn ystod 2011 yn unig. Nid y blaid honno sy’n rhedeg pethau yn Galicia, y PP sydd wrth y llyw. Mae PP Galicia yn falch iawn o’r gwariant sydd wedi ei addo. Ond mae prif weinidog newydd Sbaen, Mariano Rajoy, a aned yn Galicia, yn llwyr ymwrthod â’r cynllun ac wedi ei wneud yn amlwg na fydd yn mynd ymlaen ag ef.

Ac yn Asturias? Rydym ni’n dal i aros. Fe fydd y lein AVE o Madrid yn cyrraedd dinas Léon mewn tua flwyddyn, a mae gwaith yn cael ei wneud ar y twneli a allai ei gario i Asturias. Ond ar hyn o bryd y bwriad yw inni aros gyda’r Alvia, y trên-ddim-cweit-mor-gyflym, sydd yn rhedeg ar lein o wahanol led. Mae’r AVE go iawn yn dal i fod yn y cynlluniau, ond does neb yn mentro rhoi dyddiad arno.